Црвен картон за Болт, златото за Блејк

Автор: екипа
- Tweet
Објавено: август 27, 2011 22:00

Усеин Болт ги шокираше своите верни фанови останувајќи без пласман во финалната трка на 100 метри на Светското Првенство што се одржува во Даегу, Јужна Кореја. Најбрзиот човек на планетата важеше за главен фаворит за златниот медал, делуваше премногу самоуверено, но токму поради тоа прерано стартуваше и заработи дисквалификација.

Правилата се јасни, за погрешен старт следи црвен картон, а на Болт сигурно ќе му биде потребно доста време за да го заборави овој голем неуспех.

„Барате солзи? Нема да се случи такво нешто. Добро сум“ – беше кратката порака на Болт до камерманите и фоторепортерите кои настојуваа да го овековечат овој неверојатен момент.

Ваквиот развој на настаните го искористи сонародникот на Болт, Јохан Блејк, со фуриозна трка во вторите 50 метри стигна до златниот медал со време од 9:92 секунди. Зад Блејк се пласираа второпласираниот Американец Волтер Дикс, како и шампионот од 2003 година, Ким Колинс, кој овојпат се закити со бронзен медал.

„Не можам да ви опишам како се чувствувам во овој момент. Цел живот сонувам за ваков момент, а сега тој станува стварност. Жал ми е за Болт, тој ми има помогнато многу во кариерата, кога видов што му се случи посакав токму јас да победам, за да можам триумфот да му го посветам на него“ – изјави Јохан Блејк, новиот светски шампион на 100 метри.

Редакцијата на Екипа се оградува од сите коментари со навредлива и заканувачка содржина што ќе ги пласираат читателите. Воедно, бара од сите свои читатели да се воздржат од навреди по национална и верска основа. Таквите коментари ќе бидат повлечени.