Шампионот го посрамоти Арсенал

Автор: екипа
- Tweet
Објавено: август 27, 2011 22:00

Пресметките меѓу Манчестер јунајтед и Арсенал некогаш важеа за големи дерби дуели, но тоа очигледно повеќе не е случај. Големиот раст во играта на актуелниот првак, но и неверојатниот пад на Арсенал, се главните причини поради кои што денеска „црвените ѓаволи“ го посрамотија својот противник, декласирајќи го со неверојатни 8-2. Вејн Руни постигна хет-трик, вклучувајќи тука два еврогола од слободни удари. На висина на задачата беше и Ешли Јанг, кој со нови два погодоци покажа дека ќе биде вистинско освежување за тимот по трансферот од Астон вила. Останатите три гола за МанЈу беа дело на Велбек, Нани и Парк, кои се погрижија Арсенал да го претрпи својот најубедлив пораз во последните 115 години. По три одиграни кола, Арсенал има освоено само еден бод, но Арсен Венгер уште еднаш потенцираше дека воопшто не размислува за заминување од кормилото на англискиот гигант.

„Кога ќе примите осум гола, нормално е да се чувствувате понижени. Одигравме ужасно, бевме премногу наивни во одбраната, а Манчестер е тим што знае како да го казни тоа. Само затоа што не ја стартувавме сезоната според очекувањата, не значи дека јас ќе си заминам. Планирам да го продолжам овој проект“ – изјави Венгер.

На спротивната страна, во таборот на „црвените ѓаволи“ владееше огромно задоволство по неверојатниот триумф.

„Можеби некој ќе каже дека Арсенал бил ослабен, но јас тврдам дека славевме убедливо бидејќи ние одигравме фантастичен меч. Искрено кажано, изненаден сум од убедливата победа, но сите играчи одиграа неверојатно и наполно ја заслуживме оваа радост“ – изјави Алекс Фергусон.

Манчестер јунајтед се наоѓа на делба на првото место на табелата заедно со градскиот ривал Манчестер сити, кој што денеска како гостин го декласираше Тотенхем со 1-5. Един Џеко го одигра својот меч на кариерата постигнувајќи дури четири погодоци, а еден гол беше дело на Серхио Агуеро.

Редакцијата на Екипа се оградува од сите коментари со навредлива и заканувачка содржина што ќе ги пласираат читателите. Воедно, бара од сите свои читатели да се воздржат од навреди по национална и верска основа. Таквите коментари ќе бидат повлечени.