Македонија не се шегува – средена и Србија, дајте ја Словенија

Автор: ekipa
- Tweet
Објавено: јануари 5, 2018 19:29

Македонската ракометна репрезентација имаше успешна увертира за ЕП 2018 откако вечерва одиграа одличен меч во Белград, совладувајќи ја селекцијата на Србија со резултат 29-32. Напредокот во играта во однос на претходните средби беше очигледен, па иако Гонзалес многу комбинираше и испробуваше најразлични варијанти, темпото на игра во нашите редови многу ретко варираше. Во игра воопшто не влезе Дејан Манасков, но затоа на спротивната страна максимално расположен беше Гоце Георгиевски на десн крило, кој со осум гола беше најефикасен на натпреварот.

Гонзалес се реши за нешто поразличен стартен тим од вообичаено, со Ојлевски наместо Манасков на лево крило и Митревски како прв голман пред Ристовски. Во одбраната стартувавме со зона 5-1 со Георгиевски како најистурен во зоната, додека и Србите тргнаа со изненадувачка зона во одбраната, со тројца нешто поистурени играчи со јасна намера да ги оддалечат нашите шутери Лазаров и Талески од својата вообичаена „зона“.

Тоа ни создаваше многу проблеми во нападот на стартот, па Србија по пет минути игра поведе со 3-1. Миркуловски постигна два гола во следните неколку минути наоѓајќи лек за зоната на домаќините, но на спротивната страна Марсениќ ни создаваше многу проблеми, па Србија ја одржа предноста од два гола (5-3). Митревски беше одличен на нашиот гол, со шест интервенции за петнаесетина минути, даде самодоверба и во нападот, па со головите на Кире Лазаров и на Георгиевски нашиот состав поведе со 5-6.

Раул Гонзалес побара тајмаут при резултат 8-8, а веќе во првата следна акција Гоце Георгиевски го продолжи своето шоу во првото полувреме, постигнувајќи го петтиот гол за 19 минути игра, за водство на Македонија од 8-9. Во еден момент „црвено-жолтите“ имаа и „плус два“, но Србите пред крајот на полувремето го свртеа резултатот во своја полза. Марсениќ промаши зицер при резултат 13-12, по што нашите репрезентативци преку Ојлески и Стоилов направија пресврт, на одмор заминувајќи со минимална предност од 13-14.

Во второто полувреме Гонзалес направи неколку замени, Ристовски застана на голот, Поповски почна на десно крило наместо Георгиевски, Кузмановски се приклучи на бековската позиција, а Пешевски го замени Стоилов. Токму Пешевски беше во главна улога на стартот од второто полувреме, во кое во првите десетина минути го контролиравме резултатот, одржувајќи водство меѓу еден и два гола. На петнаесет минути до крајот Македонија водеше со 19-21, кога Кузмановски доби исклучување, но и со играч помалку одигравме одлично, поведувајќи со 20-23. Веднаш потоа две минути доби Никола Маркоски, но Кире Лазаров одлично ги разигра соиграчите, па преку Георгиевски и Стоилов поведовме со 21-25.

Цветковиќ побара тајмаут на десет минути до крајот, но нашиот напад функционираше одлично, Србите се вратија на одбрана 6-0, но во ритам влегоа Лазаров и Талески погодувајќи удари од бековската позиција. По исклучувањето на Стоилов домаќините ја преполовија предноста на Македонија (26-28), а во одбраната тргнаа со „фластер“ на Кире Лазаров. Сепак, најдовме решение со гол на Ојлески, со што беше ставен и крај на надежите на Србите за целосен камбек, и апсолутно заслужена победа на македонскиот состав, изразена со конечните 29-32.

Од она што можеше да се забележи, напредокот во играта е очигледен, а силна репрезентација како Србија да се победи на гостински терен во никој случај не е мала работа. Сепак, за очекување е уште подобро издание на нашите избраници за осум дена, кога почнуваат вистинските предизвици, дуелите со Словенија, Црна Гора и Германија во групата Ц од Европското Првенство.

тикер

Редакцијата на Екипа се оградува од сите коментари со навредлива и заканувачка содржина што ќе ги пласираат читателите. Воедно, бара од сите свои читатели да се воздржат од навреди по национална и верска основа. Таквите коментари ќе бидат повлечени.