Фалкао пристигна во Мадрид

Автор: Стеван Цаневски
- Tweet
Објавено: август 19, 2011 22:00

Навивачите на Атлетико Мадрид имаат причина да бидат задоволни откако управата на клубот ги искористи парите од продажбата на Серхио Агуеро за на „Висенте Калдерон“ да го доведе Радамел Фалкао. Колумбискиот интернационалец лани имаше неверојатна сезона во дресот на Порто, па не е изненадување што неговата цена осетно се зголеми и Атлетико мораше да плати огромни 40 милиони евра за да го доведе во своите редови. Фалкао веќе пристигна во Мадрид и на аеродромот во шпанската престолнина беше пречекан од стотици фанови на Атлетико, на кои им вети многу погодоци во црвено-белиот дрес.

– Атлетико Мадрид е голем клуб, а Ла лига е најквалитетното првенство во светот. Горд сум што доаѓам овде, знам дека Атлетико плати многу пари за да ме ангажира, тоа е само обврска повеќе за мене експресно да се покажам во вистинско светло и да почнам да ги тресам мрежите на противниците – беше првата изјава на Фалкао по слетувањето во Мадрид.

Информациите од Шпанија говорат дека Атлетико Мадрид се подготвува да го продаде Диего Форлан, а како најново засилување на мадридскиот тим се најавува бразилскиот плејмејкер Диего, кому му се избројани деновите во Волфсбург.

Редакцијата на Екипа се оградува од сите коментари со навредлива и заканувачка содржина што ќе ги пласираат читателите. Воедно, бара од сите свои читатели да се воздржат од навреди по национална и верска основа. Таквите коментари ќе бидат повлечени.