Давид Бабунски награден за добрите игри во Барселона – од идната сезона македонскиот вундеркинд, член на Б тимот на каталонскиот гигант

Автор: екипа
- Tweet
Објавено: јуни 10, 2013 20:41

Давид Бабунски е награден за добрите игри во Барселона и од идната сезона македонскиот вундеркинд ќе биде член на Б тимот на каталонскиот гигант.

Попладнево, информацијата е објавена на официјалниот сајт на европскиот гигант, а со Бабунски од кадетскиот тим во Барселона Б се селат уште шестмина фудбалери. Тимот настапува во втората шпанска лига, или популарната Сегунда Дивизија и тоа е одлична можност за македонскиот фудбалер, во иднина да атакува и на место во првиот тим.

Бабунски има само 19 години и сега го минува истиот пат на големите ѕвезди во тимот на Барса, од калибарот на Меси, Чави, Иниеста, Педро, Бускетс и уште многу други, кои најпрво беа дел од Б тимот, па потоа оттаму се префрлија во сениорскиот состав. Со нашиот интернационалец, кој е син на Бобан Бабунски, селекторот на македонската репрезентација до 21 година, во Б тимот се префрлаат и Бањак, Сампер, Калвет, Рамирез, Коста и Гафарот.

Колонијата Бабунски во Шпанија има интересна историја. Покрај таткото Бобан кој играше за Леида и Логроњес, на Иберискиот полуостров сега настапуваат и двајцата синови, Давид во Барселона и помалиот Доријан во младинските категории на Реал Мадрид.

Од Барселона соопштија и дека Жерар Делофеу, еден од најголемите светски таленти, ќе биде префрлен од младинскиот, во првиот погон на Каталонците.

Редакцијата на Екипа се оградува од сите коментари со навредлива и заканувачка содржина што ќе ги пласираат читателите. Воедно, бара од сите свои читатели да се воздржат од навреди по национална и верска основа. Таквите коментари ќе бидат повлечени.