Четири секунди не делеа од победа

Автор: екипа
- Tweet
Објавено: август 25, 2011 22:00

Македонската кошаркарска репрезентација загуби со 70-68 на првиот пријателски натпревар против Германија. Избраниците на Марин Докузовски имаа водство од 68-67 на четири секунди до крајот на средбата, кога Шафарцик постигна тројка и им донесе триумф на „панцирите“, за кои настапи и НБА ѕвездата Дирк Новицки.

На самиот истек на мечот, со звукот на сирената, се обиде Соколов да возврати со удар за три поени, но не беше прецизен. Сепак, и покрај поразот, македонските кошаркари прикажаа добра игра најавувајќи дека во добра форма ќе го пречекаат стартот на Евробаскет во Литванија.

Во првата четвртина се водеше израмнета борба, а Германците успеаја да ја добијат со 18-17. Исто така за еден поен домаќините беа подобри и во вториот период, а Македонија заигра одлично во третиот дел кога и дојде во водство. Го имаше водството до пред самиот крај, но прецизната рака на Шафарцик им ја „поништи“ победата.

Во македонскиот состав најефикасни беа центрите, капитенот Перо Антиќ и Предраг Самарџиски со по 11 поени, а еден помалку зад своите имиња запишаа Владо Илиевски и Лестер Бо Мекејлеб. Војдан Стојановски уфрли седум, а Гечевски постигна шест поени.

Кај Германците најмногу кошеви (14) постигна Крис Кејман, а Дирк Новицки го следеше со 13 поени. Човекот на одлука, Хеико Шафарцик, на крајот мечот го заврши со девет поени.

Македонија и Германија ќе одиграат уште еден пријателски натпревар, по што „црвено-жолтите“ веднаш ќе отпатуваат за Литванија на Европското првенство.

Редакцијата на Екипа се оградува од сите коментари со навредлива и заканувачка содржина што ќе ги пласираат читателите. Воедно, бара од сите свои читатели да се воздржат од навреди по национална и верска основа. Таквите коментари ќе бидат повлечени.